Giklaro ni Philippine Statistics Authority (PSA) Undersecretary Dennis Mapa nga ang kagamhanang lokal ang naghupot ug superbisyon sa mga local civil registrar ug local civil registry office.
Ang nahisgutang mga buhatan ang nagrehistro nga mao ang basihanan sa mga birth certificate nga gikinahanglan aron makakuha ug pasaporte.
Gipahayag pa sa tinubdan nga sa PSA gibutang ang tanang dokumento mahitungod sa gi-anak, kamatayon ug kasal sa mga tawo sa nasud ug gibutang kini sa national civil registry database aron sa pag-isyu ug mga kopya sa certified copies ug pagpamatuod sa mga dokumento, subay sa gisubmitar nga rekord sa ahensya.
Nagpagawas sa pamahayag ang opisyal gumikan na usab sa mga nakitang scam sa birth certificate nga nanggawas sa pagkakaron hinungdan nga mihimo ug imbestigasyon ang Senado.
Gumikan niini, nanawagan ang opisyal sa mga magbabalaod ug sa kooperasyon sa mga law enforcement agency aron maampingan ang civil registration process sa nasud.
