DAVAO CITY – Bisan nga adunay gikinahanglan nga mga permits, gibutyag sa Davao City Council committee on environment and natural resources nga ang drainage ug revetment project sa Department of Public Works and Highways (DPWH) duol sa sapa sa Maa ning siyudad ang wala sumala pa mipailalom sa tukma nga konsultasyon sa lokal nga panggamhanan.
Sumala pa kang Konsehal Diosdado Mahipus, Jr. bisan nga naka-comply ug revetment project ug mga gikinahanglan nga mga rekisitos kalakip na ang permit sa pagputol sa mga panoan sa kahoy gikan sa Department of Environment and Natural Resources (DENR) ingon man certification of no objection gikan sa land owner, wala sumala pa nakapasar ang proyekto sa Davao City Infrastructure Monitoring and Advisory Group (IMAG).
Nasayran nga ang IMAG gimugna ni Mayor Sara Duterte sa 2017, pinaagi sa Executive Order No. 32, diin tumong niini nga masigurong magmalampuson ang integration ug epektibo nga mapatuman sa DPWH ug city government projects.
Samtang gitino sab ni Mahipus nga dili sila babag sa maong proyekto nga ilalom sa Build, Build, Build Program sa Duterte administration.
Kahinumduman nga sa milabay nga semana, nagpadayag sa ilang kabalaka si Konsehal Pilar Braga diin anaa s 150 ka mga punoan ang apektado.
Samtang sa bahin sa DPWH, gipasalig nila nga tamnan ug dugang 50 ngadto na sa 100 seedlings ang nahisgutan nga areas. Samtang gitambagan sab sa komite sa konseho ang ahensiya nga mosumite ug listahan sa tanan nga DPWH projects aron nga mamonitor ug adunay koordinasyon sa umaabot nga panahon.
