DAVAO CITY – Nagmandu na si PRO Regional Director PBGen. Alden B. Delvo nga magpahigayon og pagtuon labot sa nagkataas nga kaso sa pagpanglugos sa rehiyon.
Subay sa datos sa PROXI mukabat sa 604 ang natalang kaso sa rape sukad bulan sa Enero hangtod Desyembre 2022. Hinuon, 378 niini ang nasulbad na samtang 210 ang anaa na sa preliminary investigation.
Sumala kang PRO-Davao spokesperson PMaj. Atty. Eudisan Gultiano, pinakataas nga kaso ang natala sa Davao City Police Office kon DCPO, Davao del Norte Police Office ug Davao de Oro Police Office.
Sagad sa mga kaso gikalambigitan sa mga minor de edad, kon diin ang suspek kaugalingon amahan, igsuon o kaha ig-agaw sa mga biktima. Dugang pa ni Gultiano nga usa sa mga hinungdan kon nganu nagasaka ang ihap sa rape sa rehiyon, kini gumikan sa pagka proactiveness of ahensya.
Pasabot lang matod pa niini nga wala na mahadlok ang mga biktima nga mag report sa Kapulisan. Sa pikas bahin nakig alayon na matod pa sila sa ubang ahensya aron mapakgang ang makaalarma na nga kaso sa rape.
