DAVAO CITY – Gibutang sa Provincial Government sa Davao del Norte ang P215.76 million sa ilang 2020 annual budget isip emergency funds aron nga pakigbatokan ang COVID-19 pandemic.
Sa pamahayag ni Governor Edwin Jubahib, gikanayon niya nga tumong sa pagbalhin sa pondo mao ang mas maayo nga pagresponde sa giatubang nga krisis karon gumikan kay ang nag-unang prayoridad sa probinsya mao ang pagsiguro sa panglawas sa mga sakop niini.
Sumala ni Jubahib nga ang provincial government misaad nga himoong prayoridad ang pagsulbad sa public health emergency.
Sa kasamtangan, ang probinsya sa Davao del Norte nakatala na og 10 ka positibong mga kaso sa COVID-19 nga anaa karon naka-admit sa Davao Regional Medical Center sa Tagum City.
Anaa na usa’y 22 ka mga persons under investigation (PUIs) ug 229 ka mga persons under monitoring (PUMs).
Gibutyag sa gobernador nga ang realignment sa annual budget gi-aprubahan sa Sangguniang Panlungsod sa ilang special session.
Anaa sa P2.089 billion ang kinatibuk-ang pondo sa probinsya alang sa tuig 2020.
Nasayran nga gitugutan sa Department of Interior and Local Government Unit (DILG) ang tanang mga Local Government Units (LGUs) aron nga gamiton ang ilang 20 percent nga development funds alang sa ilang paningkamot nga mapugngan ang pagkatag sa COVID-19.
