DAVAO CITY – Gi-awhag sa Provincial Government sa Davao de Oro ang mga nahibilin nga ball mill operators ug mga nanag-iya og planta nga bakantehon na ang Barangay Diwata, Monkayo.
Una ng gibutyag ni Gov. Jayvee Tyrone Uy nga anaa sa 190 gikan sa 390 ball mill operators ug land owners nga nalambigit sa mining activity sa Mt. Diwata o mas naila nga Mt. Diwalwal ang mibalhin na karon sa Barangay Mabatas.
Kahinumduman nga halos usa ka tuig na ang milabay dihang nagpagula ang Department of Environment and Natural Resources (DENR) XI ug cease-and-desist order (CDO) sa mga operators sa carbon-in-pulp (CIPs) ug ball mills sa Barangay Diwalwal isip lakang aron nga ipatuman ang rehabilation sa Naboc River.
Gimandoan sa DENR XI ang processing plants sa Diwalwal nga kinahanglan mobalhin sa Mine Processing Zone sa Barangay Mabatas.
Gitino sa kagamhanan nga wala nila gipahunong ang operasyon sa mga minahan inay buot lamang karon nga ipatuman ang tukma nga paglabay sa hugaw niini nga posibleng makadaut sa mga kasapaan sa lalawigan.
