DAVAO CITY – Gisugdan na sa probinsya sa Davao Oriental ang province wide testing nga nagtumong aron mapugngan ang posibling pagbaton og community transmission sa Coronavirus Disease (COVID-19).
Unang mipahigayon og risk-testing ang Provincial Task Force on COVID-19 sa pagpanguna ni Doctor Reden Bersaldo niadtong Nobyembre 12 sa Baganga nga nagsilbing pilot area ug pinakaunang Local Government Unit nga mipa-ilalom sa risk-testing sa probinsya ug sa tibuok rehiyon.
Sumala pa kang Bersaldo, gikan sa vulnerable sector ang mga unang gipa-ilalom sa test kinsa dali lamang mataptan og sakit o mga naa sa high-risk groups sama sa mga market vendors, economy workers, government workers, police force, mga nagtrabaho sa mga tourism establishments ug resorts ug uban pang sektor.
Gikanayon usab sa opisyal nga target sa risk testing ang 10% sa kinatibuk-ang populasyon sa nahisgutang grupo.
Tanan sumala pang mga mipa-ilalom sa maong testing ang uyon nga limitahan ang ilang lihok o lakaw ug uyon ang mga nahisgutan nga i-record ang ilang matag adlaw nga gimbuhaton hangtud mogawas ang resulta pinaagi sa waiver ug disclaimer form nga ilang gi-pirmahan.
Human sa Baganga, isunod usab sa risk-testing activity ang Governor Generoso ug Mati City gumikan kay ang nahisgutang mga dapit ang kasagarang adtoan sa mga turista.
