DAVAO CITY- Gisikop sa mga otoridad ang usa ka Property Evaluator human nga nanion ug armas sa iyahang silingan kaganihang kaadlawon.
Giila ang dinakpan nga si alias Ariel 49-anyos, ulitawo nga residente sa Malasugue St., Brgy. Lapu-Lapu, Agdao,Dist. ning dakbayan sa Davao.
Samtang ang biktima, giila nga si Kenneth Cornel Celis, 30-anyos, ulitawo ug residente usab sa nasampit nga lugar.
Subay sa report sa kapulisan nanawag ang biktima sa Sta. Ana PNP gumikan sa usa ka kagubot ug gikataho niini nga gitiunan siya ug armas sa suspek nga nakahatod ug kabalaka kabalaka ngadto kaniya.
Sa pagresponde sa kapulisan sa nahitabuan, positibo nga gitudlo sa biktima ang suspek ug nakumpiska ang pistola nga gigamit sa suspek.
Apan sa dihang gisuta sa mga nirespondeng pulis usa diay ka replika sa pistola ang gihuptan sa nanion.
Subay sa gihimong imbistigasyon, nasayran nga nasuko sumala pa ang Property Evaluator ngadto sa biktima kini gumikan sa pagpa-music niini ug kusog bisan ug lawom na ang kagabhion nga gikatugaw sab sa suspek.
Sa karon ang dinakpan ang anaa na sa kostudiya sa Sta. Ana PNP ug giandam na ang kasong pagsupak sa RA 10591.
