DAVAO REGION- Naghatag og pagpaklaro ang hepe sa Police Regional Office 11 nga si Director Brig. Gen. Aligre Martinez nga regular deployment lamang ang duha ka battalion sa PNP – Special Action Force (PNP-SAF) nga gipakatap sa nahitabong dunganong pagpatanggal sa 35 ka mga personahe sa Davao City Police Office og dili political purge sama sa nanggawa nga mga report.
Gibutyag ni Martinez nga dugay na nga naga-deploy og tropa sa PNP-SAF dinhi sa Davao Region. Sumala sa opisyal nga regular kini nga mandato sa maong elite police force nga mag-deploy og mga tropa sa tanang lugar sa Pilipinas.
Dugang paklaro usab ni Martinez nga and duha ka company sa PNP-SAF nga naka-deploy sa Davao City, pila ka tuig na silang naka-destino dinhi sa dakbayan.
Gihingusgan sa opisyal nga dili political vendetta ang nakalatid sa ilang mandato. Sa pikas bahin, naghatag og pagpaklaro si Brig. Gen. Martinez nga wala gitaktak sa pwesto isip tigpamaba sa PRO 11 si PMaj. Catherine dela Rey diin gikatarungan pa nga nahimong maayo sa iyang trabaho isip spokesperson.
Kahinumduman nga 35 ka mga sakop sa DCPO ang girelibohan sa ilang mga puwesto, apil ang kanhi hepe sa DCPO nga si Police Colonel Richard Bad-ang, kinsa gipaubos sa administrative relief.
Sumala sa mga taho, gawas kang Bad-ang, 11 ka station commanders sa DCPO ug uban pang 23 ka mga pulis, ang gitaktak usab sa katungdanan. Si PRO XI deputy regional director for operations Police Colonel Rolindo Suguilon maoy officer-in-charge o caretaker sa Davao City Police Office.
