Gidasig sa Police Regional Office XI ang tanang kapolisan sa rehiyon nga magpadayon sa ilang tahas sa pagserbisyo sa katawhan bisan pa sa kausaban sa liderato sa Philippine National Police.
Matod ni Police Brigadier General Joseph Arguelles, Regional Director sa PRO-XI, kabahin na sa normal nga dagan sa serbisyo ang pagkataktak ug pag-ilis sa mga opisyal sa kapulisan.
Gipasabot ni Arguelles nga bisan unsay mahitabo sa liderato sa PNP, kinahanglan nga magpabilin ang tanang pulis nga tumanon ang ilang mandato.
Gitingoha usab niya nga padayonon ang pagbantay sa kalinaw ug seguridad aron maprotektahan ang katawhan sa tibuok Davao Region.
Nahinumduman nga niadtong Agosto 25, gipagawas sa Office of the President ang sugo sa pagpahawa sa serbisyo ni General Nicolas Torre III, nga gipirmahan ni Executive Secretary Lucas Bersamin.
Sa iyang lugar, gitudlo si Police Lt. General Jose Melencio Nartatez, Jr. nga mahimong bag-ong Chief PNP, human kini giaprobahan ni Pangulong Ferdinand Marcos Jr.
