DAVAO CITY – Naglaum karon si PBGen. Filmore Escobal, regional director sa Police Regional Office (PRO) 11 nga maningkamut pa ang mga sakop sa kapulisan nga makaserbisyo ngadto sa katawhan ilabi na kadtong nagtinarung sa ilang trabaho.
Gitambagan sab sa opisyal ang kapulisan sa Davao region nga likayan ang pagkalambigit sa bisan unsa man nga aktibidad ilabi na ang ginadili nga druga gumikan kay dili sumala pa siya magpanuko nga palagputon ang mga badlungon nga pulis sa ilang katungdanan.
Kahinumduman nga una ng gipasidunggan sa opisyal ang mga operatiba sa Police Regional Office 11 Intelligence Division; Davao City Police Office Sasa Police Station; Philippine Drug Enforcement Agency 11; Mindanao Area Police Intelligence Office 11 ug Criminal Investigation and Detection Group 11 human nga malampuson nila nga nasikop sa buy-bust operation ang pulis nga si Police Senior Master Sergeant Shiela Laturgo Bande nga namaligya ug ginadili nga druga niining milabay nga adlaw.
Una ng nasayran nga aktibong miyembro sa PNP si Bande ug na-assign sa Philippine Bomb Information Center, Mindanao.
Nagpahigayon og hugtanon nga pagmonitor ang kapulisan batok sa nahisgutan ayha gilusad ang operasyon batok kaniya.
Sumala kang PBGen. Escobal nga ang pagkasikop kang Bande ang nagpakita lamang nga seryoso ang kapulisan sa pagpakgang sa ginadili nga druga ingon man internal cleansing sa ilang han-ay.
Ang maong insidente ang nagsilbi usab nga pahimangno alang sa tanan nga magpabilin gayud ang PRO 11 sa pakigbatok niini sa mga kriminal ug sa mga personahe sa PNP nga nalambigit sa illegal drug trade.
