DAVAO REGION- Gipasabot sa tigpamaba sa Police Regional Office XI nga dili sila ang kalaban sa mga supporters ni Kingdom of Jesus Christ Leader Pastor Apollo Quiboloy.
Sa ekskusibong pakighinabi sa Bombo Radyo Davao kay Police Regional Office XI, P/Maj. Catherine Dela Rey, gikanayon niining inay moresulta sa kagubot ug tensyon ang operasyon susama sa nahitabo kaniadtong adlawng lunes, human nisukol ang mga followers ni Quiboloy, mas maayong ilaha nalang kining kumbinsihon nga magpakita ug atubangon ang mga kaso batok kaniya.
Samtang, wala usab kamatuoran ang mga espekulasyon nga matud pa, mismong mga tropa sa mga army ang nagatago kay Quiboloy sanglit mga beripikadong impormasyon lamang ang ilang ginatuohan.
Dugang pa ni Dela Rey nga ang rason sa daghanang ihap sa mga tropa sa CIDG ug SAF ang niduyog sa operasyon gumikan kay dili lamang si Pastor Quiboloy ang ginapangita kondi ang uban pa niining lima ka mga kaubanan.
Sa pikas bahin, nanawagan si Dela Rey sa mga supporters ni Quiboloy nga tugotan sila nga buhaton ang ilang trabaho tungod walay lain tumong ang mga kapulisan kondi ang pagsunod sa kamanduan sa korte rason sa paglaom nila nga dili na mausab ang tensyon nga nahitabo tali sa mga supporters ni Pastor Apollo Quiboloy.
