DAVAO CITY – Nakiglambigit ang Police Regional Office-11 (PRO 11) ngadto sa Department of Education Region 11 (DepEd-11) alang sa pagpatuman sa anti-crime program sa tulonghaan.
Uban ang tema nga “Oplan Makabata” o “Magtutudlo ug Kapulisan, Bata Tudluan,” tumong sumala pa niini nga e-edukar ang mga estudyante, magtutudlo ingon man mga ginikanan kalabot sa nagkadaiyang crime prevention programs sa Philippine National Police.
Sumala pa kang Major Jason Baria, PRO-11 spokesperson laraw sab sa kampanya nga i-promotar ang mga adbokasiya kalabot sa dili maayong epekto sa illegal nga droga, anti-bullying ug proteksiyon sa mga nag-unang katungod sa mga bata.
Gikanayon sab ni Baria nga ang Oplan Makabata nagtumong sab nga masolusyonan ang mga concerns sa mga tulonghaan ilabi na sa kaluwasan ug seguridad sa mga estudyante ug magtutudlo ingon man magsilbing tulay sa “gap” tali sa mga bata ug kapulisan pinaagi sa class interaction aron nga wagtangon ang negatibong panlantaw sa mga pulis.
Gi-awhag sab ni Brig. Gen. Marcelo Morales, PRO-11 director, nga ang nahisgutan nga partnership makapa-awhag sa mga bata ug batan-on nga magpabilin nga lig-on, Talented, Responsible, Obedient, Nice ug adunay kahadlok sa diyos ug mamahimong peace-loving citizens sa umaabot nga panahon.
