DAVAO CITY – Mopahimutang ang kapulisan og police assistance desk sa tanang mga tulunghaan sa dakbayan sa Dabaw atol sa pag-abli sa klase sa adlaw nga Lunes.
Kini ang kabahin sumala pa sa kampanya sa Police Regional Office 11 labot sa anti-bullying sulod sa mga tulunghaan.
Gikanayon ni Police Brig. General Marcelo Morales, Regional Director sa Police Regional Office 11, nga gi-awhag usab nila ang mga magtutudlo ug ang mga ginikanan nga makighi-usa sa kampanya batok bullying nga maoy kasagarang hinungdan sa pagkahanaw sa interes sa pipila ka mga estudyante nga mopadayon sa pag-eskwela samtang ang ubang mga tinun-an makakita usab og away tali sa uban mga estudyante gumikan sa bullying.
Hinuon, gipasalig sa Department of Education (DepEd 11) nga aduna na silay gipatumang mga programa sa mga tulunghaan aron magpabilin ang hapsay nga relasyon tali sa mga magtutungha ug sa mga public schools.
