DAVAO CITY – Tig-usa ka barangay sa Davao de Oro ug Davao Occidental ang gitumbok nga election hot spots alang sa Barangay ug Sangguniang Kabataan Elections karong Oktubre 30.
Giklaro ni Brigadier General Alden Delvo, regional director sa Police Regional Office 11, nga kining mga dapita dili makonsiderar nga immediate concern tungod sa ilang kasaysayan sa intense political rivalry ug geographical nga mga lokasyon.
Hinuon, gikanayon sa hepe sa PRO 11 nga madumala ang kalinaw ug kahapsay sa maong mga barangay ug hingpit nga andam ang kapolisan sa paghatag ug kalinaw ug kahapsay alang sa BSKE.
Usa ka convergence meeting ang gipahigayon niadtong Agosto 23 tali sa kapulisan, militar, ug mga ahensya sa gobyerno aron pangandaman ang umaabot nga piniliay.
Gipasaligan ni Delvo ang Comelec sa ilang paghatag og seguridad aron masiguro ang malinawon ug hapsay nga pagpahigayon sa barangay ug SK elections.
Gibutang na sa Comelec ang gikinahanglang pagpangandam sa seguridad ug gitakda ang mga lagda ug regulasyon nga ilang ipatuman atol sa piniliay. Kahinumduman nga sa tibuok kasaysayan, nahimong hapsay ang pagpahigayon og proseso sa eleksyon dinhi sa Davao Region.
Sumala pa sa COMELEC 11, anaa sa 21,627 precincts ug 9,558 clustered/groups precincts sulod sa 1,444 voting centers ang ipangmuntar sa 1,162 barangay alang sa dul-ang 4.4 million ka mga botante sa tibuok Davao Region alang sa muabutay nga BSKE.
via || Bombo LJF
