DAVAO CITY – Gipasalig sa Police Regional Office (PRO) 11 nga magpadayon ang ilang pagmonitor sa mga investment schemes sa Davao region ilabi na kadtong walay mga igong dokumento.
Una ng gipasalig sa Inter-Agency Task Force nga subli silang magpahigayon ug inspeksiyon sa mga investment scheme sa Davao Region aron subayon kung tukma pa sa ilang operasyon ang ilang gikuha nga permit.
Una ng gibutyag ni Police Brigadier General Marcelo Morales ang hepe sa Police Regional Office (PRO) XI, nga pinaagi sa maong lakang dali na lamang nila masayran kung kinahanglan na nga ipatuman ang pagsuspende sa operasyon sa usa ka kompanya o kinahanglan na nga ipatuman ang closure order.
Nasayran nga kadaghanan sa mga investment scheme company ang adunay papeles gikan sa Department of Trade and Industry ang nag-aaply lamang sa marketing o retail sa mga wellness product apan nagapahigayon sumala pa kini ug investment transaction.
Sa kasamtangan adunay 53 ka mga natalang investment schemes ang otoridad sa Davao region diin 14 niini ang nanirado na sa kasamtangan.
