DAVAO CITY – Gipasalig sa Police Regional Office (PRO)-Davao nga panubayan nila ang gikanayong presensiya sa hired “500 guns for hire” sa lalawigan sa Davao del Sur.
Kahinumduman nga una ng gibutyag ni Davao del Sur Governor Marc Douglas Cagas nga nakadawat sila ug report nga anaa sa 500 ka mga gikanayong “guns-for-hire” ang gipakatag sa mga probinsiya aron nga gubuton ang nagsingabot nga 2022 elections.
Bisan nga kinahanglan ug verification ang nahisgutan nga impormasyon, kinahanglan nga seryoso kini nga tutukan ilabi na nga anaa na matud pa ang gikanayong mga hired men sa Kiblawan.
Una na sab nga gibutyag ni PRO-Davao Director Benjamin Silo nga imbestigahan nila kini ug i-validate ang gibutyag sa gobernador pinaagi sa ilang mga sakop sa Davao Sur Police Provincial Office.
Dugang police personnel sab gikan sa Regional Mobile Force Battalion ug Special Action Force ang i-augment arun nga masiguro ang malinawon ug luwas nga 2022 National and Local Election (NLE).
Apan una ng gibutyag ni PRO-Davao spokesperson Eudisan Gultiano nga wala pa sila nakasikop ug mga indibidwal nga nalambigit sa “gun for hire” ug andam na sab ang dugang mga sakop sa kapulisan nga ipakatag sa unom ka mga munisipalidad sa probinsiya nga gilangkuban sa Sta. Cruz, Matanao, Magsaysay, Malalag, Hagonoy, ug Padada nga gikonsidera nga areas of concern panahon sa eleksiyon.
