Gibutyag sa Department of Public Works and Highways (DPWH) nga posibleng pribadong mga sakyanan ra ang tugotan nga makagamit sa bag-ong tukod nga Twin Bypass Tunnel sa Davao City.
Sumala kang Engr. Joselito Reyes, Project Manager sa DPWH UPMO Roads Management Cluster 1 (B), ang tunnel gidisenyo isip expressway-type nga dalan nga para ra sa mga private vehicles.
Ang mga motorsiklo ubos sa 400cc, tricycle, scooter, bisikleta, ug mga truck nga adunay problema sa tambutso o walay tabon ang kargamento dili tugutan mosulod.
Gisulti ni Reyes nga padayon pa ang pagplano sa mga regulasyon sa paggamit sa tunnel, apil na ang posibilidad nga ipatuman ang toll fee sa mga moagi.
Ang Twin Bypass Tunnel kabahin sa mas dako nga 45.5-kilometro nga Davao City Bypass Road nga gilauman matapos ug magamit sa dili pa moabot ang 2028.
Magsugod kini sa Sirawan, Toril ug molusot hangtod sa utlanan sa Panabo City, Davao del Norte.
Kini nga proyekto gilauman nga makatabang kini sa pagpakunhod sa trapiko ug pagpasayon sa pagbiyahe sa mga pribadong sakyanan sa siyudad ug sa mga kasikbit nga lugar.
