Gikonsidera na nga all-time high ang presyo sa lana sa Pilipinas human sa ikaduhang sagunson nga bigtime oil price hike.
Sumala ni Sec.Sharon Garin sa Department of Energy, natala sa ahensya ang duha ka sunod-sunod nga labing taas nga pagsaka sa presyo sa mga produktong petrolyo sa kasaysayan sa nasud.
Matod niya, kini na ang maisip nga all-time high consecutive price hike sa sektor sa petrolyo.
Kini na usab ang mahimong labing taas nga presyo sa maong mga produkto base sa rekord sa kasaysayan.
Gidugang pa sa nahisgutang opisyal nga posibleng mas mahal pa ang presyo sa lana sa mga lugar nga layo sa National Capital Region, ilabi na sa mga lugar nga kinahanglan pa og taas nga biyahe aron madeliver ang supply sa petrolyo.
Nagsugod ang unang bigtime oil price hike niadtong Martes, Marso 10, pipila ka adlaw human mibuto ang giyera sa Middle East diin daghang nasud ang nalakip sa halapad nga panagsangka.
Karong adlawa gipatuman na usab sa mga kompanya sa lana ang ikaduhang sunod-sunod nga pagsaka sa presyo.
Kung pagasumahon, halos P50 na ang misaka sa diesel, kapin P42 sa kerosene, ug kapin P25 sa gasolina.
