Miusbong sumala pa ang presyo sa buwak ning dakbayan sa Davao kasabay kini sa umaabot nga Valentine’s Day.
Gikanayon sa pipila ka mga negosyante og buwak nga daghang hinungdan sa kalit nga pagmahal sa mga buwak.
Una na niini, ang dili maayong kondisyon sa panahon sa mga lugar nga nagapananom sa mga buwak nga maoy nagresulta sa pagkunhod sa produksiyon.
Ang pipila usab ka mga mag-uuma mitaho sa kakulangon sa ani gumikan sa sobra nga kainit o kalit nga pagbaha nga nakaapekto usab sa ilang tanom.
Ikaduha sa mga nakita nga rason, mao ang ang gasto sa transportasyon ug gasolina, nga midugang usab sa kinatibuk-ang gasto sa pagpadala sa mga buwak gikan sa mga uma ngadto sa mga tindahan.
Ang dugang nga gasto sa ‘logistic’ awtomatiko nga giapas sa presyo sa merkado, ug kini karon ang gibati sa mga konsumante.
Samtang, pipila ka adlaw ayha ang Valentine’s Day, nagusgod na og dagsa ang mga tawo sa mga merkado ug mga tindahan sa buwak isip pagpangandam sa ilang mga regalo sa ilang mahal sa kinabuhi alang sa umalabot nga Valentine’s Day karong Pebrero 14.
Apan karong tuiga, lahi sumala pa ang kasinatian sa daghang mga mamalitay gumikan sa pagsaka sa presyo sa mga buwak, ilabi na ang rosas nga misaka og 20% ngadto sa 30%.
Ang rosas, nga kasagarang nagkantidad og 50 ang buok kaniadto, karon misaka na ngadto sa 60 hangtod 70. Lakip usab ang presyo sa mga bouquet ug mga simple nga floral arrangements naapektuhan na usab.
Sumala pa ni Enesh Flawrisha usa sa mga negosyante og buwak sa Bankerohan Public Market, nga daghan kanila sumala pa ang nag-order og sayo sa ilang mga stock aron maseguro ang suplay sa mga buwak.
Apan, nagpahimangno kini sa ilang mga kustomer nga magdahom sa mas taas nga presyo.
Ang pipila ka gagmay nga mga tindahan sa buwak nagplano usab nga limithahan ang ilang gidaghanon sa bouquet nga ibaligya aron malikayan ang kakulangan ug maseguro nga matag kustomer makapalit gihapon.
Samtang, nagpahimangno usab ang mga economic expert, nga posibleng magpadayon ang taas nga presyo sa mga buwak hangtod mahuman ang Valentine’s season.
