Milukop sa San Pedro Square niadtong Dominggo, Septyembre 21, ang kapin 7,000 ka mga Dabawenyo nga mitambong sa dakong kalihukan nga giulohan sa “Pray for the Philippines” rally, usa ka panawagan nga nagtimaan sa ika-53 nga anibersaryo sa Martial Law.
Ang rally gihulagway isip panagtigom alang sa pag-ampo ug panaghiusa, apan nahimong higayon usab sa mga lumulupyo sa Davao nga ipadayag ang ilang hangyo nga ipauli na sa lungsod si kanhi Pangulong Rodrigo Duterte.
Lakip sa kalihukan ang pagbahin sa cake nga buwaya nga 4 metros ang gitas-on, usa ka farmed crocodile lechon, ug kapin 100 ka lechon baka nga gipaambit ngadto sa mga rallyista. Matod pa ni Bise Presidente Sara Duterte, ang pagkaon sa buwaya nga cake nagsimbolo sa pagtapos sa kurapsyon ug sa pagpaningkamot sa mga Pilipino nga makab-ot ang mas limpyo nga panggobyerno.
Gipangulohan sa mga opisyal sa syudad ug nasyonal ang kalihukan diin gilauman usab ang pag-apil ni Senador Ronald ‘Bato’ dela Rosa, ug si Senador Bong Go.
Samtang nagapadayon ang programa, misamot ang pagdagsa sa mga katawhan nga nagpakita sa ilang suporta ug determinasyon nga makig-uban sa kalihukan alang sa nasud.
