DAVAO CITY – Gibutyag ni Franz Irag, Acting information officer sa Office of the Civil Defense (OCD) 11 nga sugdan na sa Enero 28 hangtud Marso ang ilang post-disaster-needs assessment diin kini sumala pa ang himuong basehan sa National Economic Development Authority (NEDA) alang sa planong rehabilitasyon sa mga lugar sa Davao del Sur nga grabeng naapektohan sa sunod-sunod nga linog sa milabay nga tuig.
Lauman sumala pa nga sa bulan sa Abril masumite na nila sa NEDA ang ilang assessment aron nga makahimo gilayon ang ahensiya sa ilang rehab and recovery plan.
Gitataw sab sa nahisgutan nga sa kasamtangan natukod na matud pa ang temporary shelter sa mga residente nga i-relocate diin ang Brgy. Malawanit sa Davao del Sur ang usa sumala pa sa ilang prayoridad sa National Housing Authority (NHA) nga tukoran og mga panimalay.
Gawas sa nahisgutan nga dapit, kinahanglan sab sumala pa nga ibalhin og mas luwas nga lugar ang pipila ka mga residente sa Bansalan, Magsaysay, Hagonoy ug Digos City.
