DAVAO CITY – Dungan sa padayon nga pag-ubos sa coronavirus infection sa dakbayan sa Davao, misasad na sab karun ang positivity rate ngadto sa dos porsyento na lamang ug anaa na lamang sa single digit matag adlaw ang bag-ong natala nga mga kaso sa milabay nga semana.
Sumala pa kang Davao City Covid-19 Task Force spokesperson Dr. Michelle Schlosser, ang positivity rate karun sa siyudad ang anaa sa 1.8 percent.
Mas ubos kini sa acceptable rate nga lima ka porsyento diin nagpadabot kini nga ang Covid-19 cases sa usa ka area ang manageable.
Sagad sab sumala pa sa mga kaso nga natala karun sa dakbayan ang susama nga asymptomatic ug mild cases.
Nasayran nga sa milabay nga March 22, anaa lamang sa tulo ang natalang bag-ong kaso sa dakbayan.
Ulahi sumala pa nga nakatala ang dakbayan ug single digit cases kaniadtong second half sa Disyembre 2021 ug January 1, 2022.
Samtang kinatibuk-ang 91 ka mga kaso ang natala sa milabay nga usa ngadto na sa duruha ka semana.
Samtang gitino sa Covid-19 Task Force nga luyo sa pag-ubos sa mga natala nga kaso, magpadayon pa gihapon ang pagpaningkamut sa dakbayan partikular na ang contact tracing bisan paman nga mas luag na karun ang Covid-19 restrictions ilalom sa Alert Level 1 classification.
