Gipahayag sa hataas nga opisyal sa Department of Justice (DOJ) nga dili mamahimong diktahan o impluwensyahan sa gobyerno sa Pilipinas ang posibleng extradition ni Kingdom of Jesus Christ leader Pastor Apollo Quiboloy sa Amerika.
Kini homan gisulti sa abogado ug tigpamaba sa KOJC nga si Atty. Israelito Torreon nga atubangon lamang ni Pastor Quiboloy ang mga kaso niini sa higayong magpagawas si Pangulong Ferdinand Marcos Jr. ug written declaration nga walay extraordinary rendition kang Quiboloy sa Amerika.
Gipahayag ni DOJ USec. Raul Vasquez nga kini ang usa ka legal issue nga gikinahanglang pagatun-an kini pag-ayo.
Dugang gipahayag pa sa opisyal nga nakatali ang Pilipinas sa extradition treaty sa Estados Unidos, hinungdan nga walay opisyal sa gobyerno ang mosupak sa balaod.
Obligasyon usab kini sa estado sa bisan si kinsa ang naghupot sa leadership position.
Samtang giklaro usab sa opisyal nga dili niini pangunahan ang bisan unsang mahimong desisyon sa mas hataas nga opisyal mahitungod sa mga kondisyon ni Quiboloy.
Apan kung ugaling paburan ang gipangayo ni Quiboloy, kini ang unfair o dili patas alang sa uban nga nag-atubang sa mga kaso susama sa mga kabus nga tawo.
Kung kahinumduman nga gawas sa mga kaso dinhi sa Pilipinas, adunay existing arrest warrant ang puganteng pastor sa Amerika gumikan sa kaso nga adunay kalabutan sa sex trafficking, fraud, cash smuggling ug uban pa.
Unang giakusahan ni Pastor Quiboloy ang US Government nga nakigkunsabo kuno sa gobyerno sa Pilipinas ubos sa pagdumala ni Pangulong Marcos jr. ug pagplanong i-eliminate siya pinaagi sa extraordinary rendition o sekretong pagbalhin sa usa ka indibiduwal, pagpailalom sa usa ka grabeng interogasyon, torture o lakip na ang kamatayon nga walay due process.
