Misaka sumala pa og 590% ang police killings sulod sa unang 25 ka bulan sa paglingkod ni kanhi Presidente Rodrigo Duterte niadtong 2016, sumala sa prosekusyon sa International Criminal Court (ICC).
Sa ikaduhang adlaw sa confirmation of charges, gibutyag ni ICC trial lawyer Robynne Croft nga sistematiko ug lapad ang gidak-on sa mga pagpamatay nga nalambigit sa war on drugs.
Adunay dili moubos sa 274 ka kumpirmadong pagpamatay samtang mayor pa si Duterte sa Davao City, ug misamot pa kini sa dihang nahimo na siyang presidente.
Samtang 3,000 hangtod sa 5,000 ang opisyal nga ihap sa gobyerno, gibana-bana sa human rights groups nga posible nga tulo ka pilo ang mas taas sa aktuwal nga ihap.
Sa Bulacan, misaka kuno og 1,600% ang police killings, ug mas taas pa ang ihap kada 100,000 ka mha populasyon kung itandi sa tibuok nasud sa India gikan 2016 hangtod 2018.
Sumala sa eksperto nga gi-interbyu sa prosekusyon, ang pinakatin-aw nga pasabot niini mao ang giingong paglungtad sa usa ka lapad nga polisiya sa extrajudicial killings.
Giingon usab sa prosekusyon nga gidala matud pa sa kanhi presidente ang gitawag nga “Davao formula” sa national level uban sa mga kaalyado sa taas nga posisyon, ug gipakita usab sa prosecutor ang mga pamahayag ni Duterte nga kuno nag-awhag sa kapulisan sa pagpamatay baylo sa proteksyon ug ganti kon reward.
