Nagtuo ang Philippine National Police nga nahugawan ang ilang integridad sa pagtawag ni kanhi Albuera, Leyte ug Ozamiz City Police Chief Col. Jovie Espenido sa PNP nga ‘biggest crime group’.
Gihisgutan kini ni Espenido atol sa hearing sa House Quad Committee kagahapon kalabot sa extra-judicial killing nga may kalabotan sa war on drugs sa miaging administrasyon.
Matod ni PNP Public Information Office Col. Jean Fajardo, daghang mga pulis ang matinud-anon ug seryoso sa ilang katungdanan, aduna usay mitahan sa ilang kinabuhi maong nasubo sila sa pagkadungog niini gikan sa usa ka sakop sa PNP.
Bisan pa niini, matod niya magsilbing hagit kini sa tibuok organisasyon nga mas pakusgan pa ang ilang trabaho.
Seryoso usab ang pamunoan sa PNP sa pagpabiling limpyo sa ilang han-ay ug dili gyud motugot sa sayop nga binuhatan sa usa ka pulis.
Sa katapusan, nanawagan si Fajardo sa publiko nga adunay “credible information” bahin sa bisan unsang kasaypanan sa ilang han-ay nga moduol ug mohatag og impormasyon aron kini masusi sa patas ug subay sa balaod.
