DAVAO CITY- Mas masaligon na matud pa ang mga kapulisan nga hapit nang masikop si Pastor Apollo Quiboloy.
Kini mao ang giluwatang pamahayag ni Police Regional Office XI Director PBGEN. Nicolas Torre III human ang duha ka aldaw nga padayong pagpangita sa maong pastor ug 4 ka mga kaubanan niini sulod sa Kingdom of Jesus Christ Compound.
Kahinumdumang niadtong sabado sa kadlawon, nagpanon ang kapin dos mil ka mga kapulisan sulod sa KOJC compound aron magsilbi og warrant of arrest batok sa mga nagtago-tagong indibidual.
Gani pagbutyag pa sa maong opisyal nga niadtong unang adlaw ang gibuhat matud pa sa mga kapulisan mao ang pagsuta sa mga istruktura aron mahibal-an matud pa ang sunod nila nga lakang.
Sumala pa nga ang ground-penetrating radar (GPR) nga ginagamit ning kasamtangan sa mga kapulisan mao ang usa ka geophysical method nga pamaagi nga naggamit sa mga pulso sa radar aron mahulagway ang ilawom sa yuta nga matud pa kasagarang ginagamit sa pagrescue og mga tawo.
Dugang pa ni Torre nga matud pa aduna silay mga nasuta nga mga undergrounds ug bunkers nga posibleng ginataguan sa maong pastor kaniadto ug kabalo na sila sa entrance niini.
Ning kasamtangan anaa pa usab sa maong kompound ang mga kapulisan aron sa pagpadayon sa pagpangita sa maong puganteng pastor.
