DAVAO CITY – Niduaw sa Police Regional Office 11 sa Camp Sgt. Quintin M. Merecido, Buhangin, Davao City si PNP Chief General Rodolfo Azurin, Jr. alang sa usa ka Command Visit kagabii, Abril 10.
Atol sa iyang hinanaling paghapit sa PRO 11, nagpadayag kini sa iyang pagpasalamat ngadto sa kapulisan sa Davao Region sa ilang paningkamot aron muubos ngadto sa 40% ang kasamtangang crime rate sa tibuok nasud.
Gihangyo sab sa kasamtangang hepe sa PNP nga palawigon pa ang pagbantay sa seguridad sa mga public officials pinaagi sa pagpanubay sa ilang mga threat levels kon bahad sa ilang kinabuhi samtang nagkaduol na ang Barangay ug Sangguniang Kabataan Elections.
Naghinaot si Azurin ang luwas nga eleksyon alang sa mga opisyales ug ingon man sa mga sibilyan.
Nagpahinudom sab ang hepe sa kapulisan nga palig-unon ang ilang pakig-alayon sa ilang komunidad pinaagi sa paglusad og mga programa alang sa kalinaw ilawom sa KASIMBAYANAN o Kapulisan, Simbahan, at Pamayanan Program sa kapulisan.
Gipunting sab ni Azurin ang kamahinungdanon sa kahapsay sa tibuok rehiyon alang sa pag-aghat sa mga stakeholders nga mamuhunan dinhi sa rehiyon isip yawe sa pagpapiskay pag-usab sa ekonomiya sa nasud nga gipahapa sa unang bahin sa pandemya.
Nagpahibalo sab ang opisyal nga pakusgan pa ang ilang kampanya sa droga nga gisudgdan sa kanhi administrasyong Duterte.
Gihangyo karon ni Azurin sa iyang gikatakdang paghawa sa serbisyo isip Hepe sa PNP, nga ipadayon gihapon sa kapulisan ang pagpanerbisyo ug pagpanalipod sa katawhan taliwala sa mga kritisimo nga nadawat sa maong han-ay.
via || Bombo LJF
