DAVAO CITY – Giduaw ni PNP Chief PGen Benjamin Acorda Jr. ang buhatan sa Police Regional Office 11 kagahapon sa buntag, Hunyo 30.
Atol sa iyang pagbisita, nagpadayag kini sa iyang pagpasalamat sa kapulisan sa Davao Region ug gipadayag sab sa hepe ang iyang mga pagdayeg ngadto sa PRO 11 tungod moderno ug sistematikong Command Center nga matud pa makatabang sa pagpakgang sa kriminalidad sa rehiyon.
Gikalipay sab sa hepe nga nahimong layo sa kontrobersya ang han-ay sa kapulisan atol sa iyang pagpangatundanan isip PNP chief.
Gipasalig sab sa hepe nga matud pa andam sila nga ubanan ug dili biyaan ang tibuok han-ay bisan pa man sa mga isyu ug suliran nga gisagubang sa han-ay sa kapulisan.
Gipangandaman sab sa PNP ang mga mamahimong lakang sa seguridad sa umaabot nga Barangay and Sangguniang Kabataan Elections karong tuiga.
Sumala pa ni Gen. Acorda, pipila sa mga ginabuhat karon sa kapulisan mao ang paggukod sa mga dunay loose firearms, paghatag og warrant of arrest sa dunay mga kasong murder, homicide, ug mga indibidwal nga posibleng magamit sa ubang krimen karong piniliay sa barangay.
Ginaidentipika sab sa PNP ang mga lugar nga dunay taas nga concern kon mamahimong election hotspots nga gilaumang mahatagan og hugot nga seguridad sa BSKE.
Naglaum ang PNP chief nga mamahimong luwas ang pagahimoong eleksyon sa mga kabarangayan sa tibuok nasud.
via || Bombo LJF
