DAVAO CITY – Andam na ang anaa sa usa ka libo ka mga personahe sa Compostela Valley Provincial Police Office aron nga maghatag og seguridad sa gikatakdang plebisito sa Compostela Valley karong Sabado kung diin hulipan na ang pangalan sa lalawigan ngadto sa Davao de Oro.
Sumala pa kang Police Brig. Gen. Felmore Escobal, regional director sa Police Regional Office (PRO) 11, gawas sa nahisgutang mga personahe, aduna say ideploy nga augmentation gikan sa Regional Mobile Force Battalion (RMFB) aron masiguro nga hapsay nga ipahigayon ang plebisito.
Sa kasamtangan, wala matud pay nadawat nga hulga ang otoridad apan dili pa gihapon sila pakampante niini ilabi na nga aduna pa gihapoy mga lugar sa Comval nga dunay presensiya sa mga rebeldeng grupo.
Nasayran nga anaa sa 410,261 ka mga residente ang lauman nga muboto gikan sa 261 ka mga Barangay sa lalawigan.
Gibutyag usab ni Escobal nga magpatuman sab sila og gun ban sa lugar.
