DAVAO CITY – Gikatakdang mapasakahan og kasong Alarm and Scandal ang pito ka mga indibidwal nga nalambigit sa nahitabong kagubot sa Paz Eatery sa Bankerohan ning dakbayan niadtong Dominggo sa kaadlawon, Mayo 19.
Sumala pa sa Davao City Police Office, nailhan na ang mga indibidwal nga dungang gipatahan sa San Pedro Police Station kagabii alang sa pakighinabi og settlement.
Nasayran nga usa ka 17 anyos ang biktima nga gitabangan og kulata sa unom ka mga kalalakin-an tungod lamang sa lingkuranan ug pwesto sa kan-anan.
Nagpinasayloay na ang mga nahisgutan ug dili na matud pa sila magkinasohay. Nanghinaot sab ang tag-iya sa kan-anan nga mabayaran ang mga nadanyos sa nahitabong kagubot.
Apan taliwala sa pakipag-areglo sa mga nalambigit, gibarugan sa DCPO nga padayon ang pagpasaka og reklamo batok kanila aron dili na kini pamarisan pa sa mga Dabawenyo.
Sa pikas bahin, nagpaklaro ang Davao City Police Office mahitungod sa isyu nga walay pulis nga miresponde atol sa nahitabong panagbugno sa Bankerohan nga nalukop sa area of responsibility sa San Pedro PNP.
Sumala pa ni Police Captain Hazel Tuazon, ang tigpamaba sa DCPO, nga nagapatrolya gihapon ang mga pulis nga na-assign sa maong area, apan layo sa gipanghitaboan sa insidente ang ilahang outpost maong ulahi na lamang dihang nakasibat na ang mga nalambigit niini.
Naghangyo karon ang DCPO ngadto sa mga barangay auxillaries ug ang komunidad nga tabangan sila sa pagsegurong luwas ang palibot taliwala sab sa kakulang sa ilahang pwersa.
via || Bombo LJF
