DAVAO CITY- Naghaguros nga tubig-baha ang nipukaw sa mga residente sa Ilocano Village lakip na usab sa Susana Homes, Toril, ning dakbayan, kagabii.
Makita sa video ang kusog nga bul-og sa tubig-baha sa mga kalsada hinungdan nga nagpaguwa gilayon og advisory ang hingtugdang ahensya sa pagpahikling sa mga residente sa nasampit nga lugar.
Gani, niabot pa sa tuhod ang gitas-on sa tubig-baha nga nisulod pa sa usa ka convenience store. Gipatuman usab ang pre-emptive evacuation sa mga residente nga napuyo duol sa Bangkas Creek, Prk. 5 ug 7 gumikan sa pagsaka sa level sa tubig sa sapa nga code red kon critical level.
Hinoon, walay gikatahong nasamdan o nakabsan sa kinabuhi sa maong mga pagbaha apan kadaghanan ang wala nakatulog gumikan sa pagbantay matag segundo ug oras.
Pahimangno usab sa mga otoridad ngadto sa katawhan karong panahona nga magpabiling igmat hilabi pa sa mga residente nga nagpuyo duol sa mga sapa ug landslide prone areas tungod sa risgo nga pagbaha ug pagdahili sa yuta.
