DAVAO CITY – Gibutyag sa usa ka konsehal ning siyudad nga kinahanglan sumala pa nga amyendahan ang pipila ka ordinansa nga mohatag ug dalan alang sa High Priority Bus System (HPBS), usa sa mga major project sa siyudad diin tumong niini nga ma-modernize ang public transportation system sa dakbayan.
Apan gibutyag ni Konsehal Danilo Dayanghirang, nga wala pa sila nakadawat ug bisan unsa man nga request kalabot sa pag-amyenda sa kasamtangan nga traffic ug transportation policies sa siyudad.
Laraw sa HPBS nga masolusyonan ang nagkataas nga panginahanglanon sa mass transit system aron nga masulbad ang paghuot sa dagan sa trapiko sa dakbayan.
Posible sumala pa sa mga amyenda sa ordinansa mao ang ipatuman nga rota, franchise nga i-isyu sa Land Transportation Franchising and Regulatory Board (LTFRB) sa mga sakyanan.
Sayo ning kasamtangan nga tuig, gibutyag sa opisyal nga ang pilot testing sa HPBS ang ipatuman tunga-tunga sa kasamtangan nga tuig o ayha matapos ang 2019.
