DAVAO CITY – Gibutyag sa Bureau of Fire Protection (BFP)-Davao nga adunay pipila ka mga government-sponsored buildings, sama sa mga tulonghaan ang wala mitamud sa fire safety standards ug wala mikuha ug building permits.
Sumala pa kang BFP-Davao Public Information Section Fire Chief Inspector Cyrus Medina nga atol sa ilang gipahigayon nga inspeksiyon sa mga tulonghaan sa rehiyon, nakatala sila ug pipila ka mga kalapasan sama na lamang sa dili tukma nga installation sa electrical wirings nga mamahimong hinungdan sa sunog.
Base sa ilang record kaniadtong Abril 2019, nakatala sila kinatibuk-ang upat ka insidente sa sunog nga gikalambigitan sa mga tulonghaan.
Aduna sumala pay pipila ka mga contractors sa government projects ang wala mikuha ug building permits.
Gitambag sa opisyal nga kinahanglan mopailalom sa tukma nga proseso, motamud sa building code, electrical code, ug fire safety code. Human nga ma-proseso ang building permit, ang aplikasyon isumite sa ilang buhatan ug kini na ang mopahigayon ug gikinahanglan nga inspection. Gihangyo sab niya ang Department of Public Works and Highways nga kinahanglan i-require ang mga government-sponsored projects nga magbaton ug building permits, ingon man ang mga contractors aron nga masiguro ang kalidad sa gambalay ug malikayan ang bisan unsa man nga aksidente sama na lamang sa sunog.
