DAVAO CITY – Gipasigarbo ni Pangulong Rodrigo Duterte atol sa iyang ika-upat nga State of the Nation Address (Sona) ang pipila ka mga ordinansa nga gipatuman dinhi sa dakbayan sa Davao.
Pipila sa mga gi-highlight sa Pangulo ang 911, Liquor Ban, Anti-Nuisance Ordinance (Karaoke Ban) ug Smoking ordinance nga iya gihimong Executive Order sukad nga milingkod sa katungdanan kaniadtong 2016.
Una ng gibutyag sa Pangulo nga aduna pa gihapoy mga siyudad ug munisipalidad sa nasod ang walay bag-ong mga kahinaman ug adunay pipila usab ka mga lugar ang walay bag-ong mga fire truck.
Gitambagan sab niini si finance secretary Carlos “Sonny” Dominguez nga mo-alokar ug lain nga pundo aron nga i-modernize ang fire department.
Gitataw sab ni Pangulong Duterte nga sukad migamit ang siyudad ug 911 emergency hotline system tanan nga mga auxiliary services gikan sa fire ngadto na sa rescue department ang gitahasan nga moresponde sa tanan nga tawag.
Kalakip sab sa gipanawagan niini sa kongreso ang pag-amyenda gilayon sa Sin Tax Law nga magamit aron pag-subsidize sa bag-ohay pa lamang nga napalabang nga Universal Health Care (UHC) Law.
Gipahimangnoan sab niini ang tanan nga mga Mayors, governors ug uban pang tag-as nga opisyal ug provincial government executives nga limitahan ngadto sa tulo ka adlaw ang transaksiyon sa publiko.
Kahinumduman nga kaniadtong nagdumala pa isip Mayor sa siyudad, molungtad ug usa lamang ka oras ang pag-proseso sa mga gikinahanglan nga dokumento.
Una na sab nga gilagdaan ni Pangulong Duterte ang Ease of Doing Business Act nga nagmando nga kinahanglan paspas ang transaksiyon sa ahensiya sa kagamhanan sulod sa tulo ka adlaw.
