DAVAO CITY – Daghanan ang mipakita ug pag-uyon nga dili na ilakip ang dakbayan sa Davao sa gipatuman karon nga Martial law sa Mindanao.
Kahinumduman nga mismong si Davao City Mayor Inday Sara Duterte Carpio ang nagbutyag nga iyang hangyuon ang iyang amahan nga si Pangulong Rodrigo Duterte kalabot sa maong lakang human nga kini ang nag-unang concern sa mga investors atol sa gipahigayon nga Davao-Icon sa siyudad.
Apan gikanayon ni Capt. Jerry Lamosao, tigpamaba sa 10th Infantry Division (ID) Philippine Army nga bisan ug malinawon ang dakbayan kinahanglan pa gihapon nga ipailalom kini sa assessment o validation ayha ipatuman ang nahisgutan nga lakang.
Samtang sa bahin ni Department of Interior and Local Government (DILG) regional director Alex Roldan, uyon siya nga dili na lamang ilakip ang dakbayan sa Davao sa balaod militar gumikan kay mamahimong usa kini sa mga hinungdan nga magduha-duha pagsulod ang mga investors.
