DAVAO CITY – Gibutyag sa Davao Light and Power Company (DLPC) nga hangtud karon aduna pa gihapoy pipila ka mga lugar sa Bangkal ning dakbayan ang walay supply sa kuryente sukad nga miigo ang kusog nga baha halos usa ka semana na ang milabay.
Sagad pa gihapon sa mga residente ang migamit ug lampara o flashlight panahon sa kagabhi-on gumikan sa kangit-ngit sa ilang lugar.
Sumala pa sa DLPC, nagpadayon ang ilang restoration sa kuryente human ang pagbaha ug adunay gisubay nga mga linya sa kuryente.
Sa kasamtangan anaa sa 10,422 o 99.49 percent na nga nabalik ang kuryente sa mga apektadong lugar.
Bisan nga nasabtan sa mga residente nga kinahanglan una nga putlon ang linya sa kuryente sa ilang dapit, apan nabalaka sab sila panahon sa kagabhi-on gumikan sa kangitngit sa dalan.
Pipila sa mga lugar nga kinahanglan pa nga ibalik ang kuryente ang gilangkuban sa area sa Matutum Street, Central Park Subdivision; Taal Road, Central Park Subdivision; Kanlaon Street, Central Park Subdivision; New Zealand Street, NHA Bangkal Phase 3; Makiling Street, Central Park Subdivision ug Royal Valley.
Gitataw sab sa Davao Light nga nagpahigayon sila ug massive replacement sa ilang metrohan kagahapong adlawa alang sa mga nahibilin nga kustomer nga grabeng naapektohan sa pagbaha.
