DAVAO CITY – Miapas pa sa pagtahan sa ilang kaugalingon ang napulo ka mga piniriso kansa gipagawas ilalom sa programa sa Good Conduct Time Allowance kun GCTA law sa Davao City Police Office.
Kahinumduman nga mihatag lamang og lugway nga 15 ka adlaw si Pangulong Rodrigo Duterte ngadto sa mga kanhi nahukman aron nga musurender.
Gibutyag ni Capt. Nolan Tagsip, tigpamaba sa Davao City Police Office (DCPO), 36 ka mga piniriso nga naka-avail sa GCTA law ang naa sa ilahang listahan, diin napulo pa ang misurender ug 26 pa ang padayun nga ginapaabot aron mutahan.
Dugang pa sa opisyal nga nakadawat sila og direktiba gikan sa higher headquarters nga ihold ang manhunt operations sa katuyuan nga hiusahon una nila ang ilang record gumikan kay basin ang anaa sa ilang listahan nakasurender na sa ubang rehiyon.
Kasamtangan na sab nga ginaproseso sa Department of Justice kun (DOJ) ug sa Philippine National Police Headquartes ang mga records arun nga makuha ang pinal nga listahan sa mga pangalan.
Ang mga mahilakip sa listahan ang target sa ipahigayon nga nationwide manhunt operation.
Apan bisan paman sa gikatakdang deadline sa Pangulo, gi-awhag gihapon ni Tagsip ang mga kanhi nahukman nga mutahan gihapon sa ilang kaugalingon.
