DAVAO CITY – Subling gibaha ang pipila ka bahin sa dakbayan kagabii human nga mibundak ang kusog ang ulan.
Pipila sa mga naapektohan ang Talomo Proper ug Puan nga maoy hinungdan sa paghuot sa dagan sa trapiko sa nahisgutan nga lugar.
Dali sab nga nanirado ang pipila ka mga establisyemento sa maong dapit sama sa drug store ug gasoline station.
Kalit sab nga mi-awas kagabii ang Temporary bridge sa Matina Pangi hinungdan nga daghanang mga residente ang apektado.
Dali sab dayon nga gipatingog ang alarm system hinungdan nga pipila sa mga residente ang mibakwit.
Kalakip sab sa mga nag-overflow ang Creek sa Purok 9, Barangay Tacunan samtang ang mga residente sa Catalunan Pequeño ug Brgy. Sto. Niño, Tugbok ang dali sab nga gipabakwit human nga misaka ang tubig-baha.
Hinuon dali sab dayon nga mibalik ang mga apektadong residente sa ilang tagsa-tagsa ka mga panimalay human ang pag-ubos sa tubig baha. Problemado sab ang pipila ka mga residente sanglit bag-ohay lamang siya nga gibaha sa milabay nga bulan.
