DAVAO CITY- Nakasinati og grabeng pagbaha ang daghanang dapit ning dakbayan kagabii. Kini gumikan sa way undang nga pagbunok sa ulan gumikan na usab sa epekto sa Low Pressure Area ug Southwest Moonsoon.
Pipila sa mga lugar nga gipangbaha mao ang mga nagpuyo sa Panacan, Laverna Hills, Buhangin, Damosa, Communal ug uban pa.
Tungod sa maong pagbunok sa pag-ulan ug pagbaha, daghanang mga motorista ang nangatanggong sa kalsada hilabi pa nga niabot na sa hawak ang katas-on sa tubig-baha.
Bisan paman sa pahimangno nga dili mopugos og labang sa kalsada, aduna gihapoy wala naminaw ug nipugos gihapon sa pagmaneho hinungdan nga natanggong hinoon kini tunga sa kalsada ug maoy hinungdan sa traffic.
Gawas niini, pipila ka mga residente sab ang wala nakatulog sanglit adunay mga dapit ning dakbayan ang gisulod na og tubig-baha rason sa pagpanglutaw sa ilang mga kagamitan hilabi pa nga halos niabot na ang katas-os sa tubig sa abaga.
Alayon niini, natinabangay na lamang ang mga residente sa pagsalbar sa ilang mga kaugalingon aron nga malikay sa mga dili maayong panghitabo.
Una nang gikumpirma sa Dost-PAGASA ang low pressure area (LPA) kaniadtong nakalabayng adlaw kung diin gibantayan ang panagtapok sa mga dag-om kon cloud cluster sa sidlakang bahin sa Mindanao.
Subli sab nagpahinumdom ang mga hingtungdan ahensya sa katawhan nga magpabiling igmat ug mabinantayon hilabi pa sa mga nagpuyo daplin sa sapa.
Kalakip sa mga naapektohan sa LPA mao ang CARAGA, Eastern Visayas ug uban pang bahin sa Bicol Region tungod sa weather disturbance formation nga anaa sa atoang teritoryo.
