Nakadawat ug mga pagdayeg sa mga Japanese netizens ang usa ka Pinoy sa Fukuoka, Japan gumikan sa pagluwas niini sa kinabuhi sa usa ka bata nga nalunod sa dagat.
Matod pa adunay usa ka Japanese family ang nag-fishing outing sa Hakozaki Wharf, usa ka sikat nga recreational fishing spot sa mga residente sa Fukuoka.
Bandang 5:10 p.m., ug milakaw ang bata sa pamilya niini apan aksidenting nahulog kini sa dagat samtang naglakaw.
Usa ka industrial area ang nahisgutang lugar ug 6.6 feet ang gitas-on sa nahulugan sa bata padulong sa dagat.
Niadtong panahuna, usa ka 26-anyos nga Pinoy ang kasamtangang anaa usab sa lugar ug sa dihang nakita niini nga nahulog ang bata, mi-ambak dayon kini sa dagat aron luwason ang batang Hapon.
Luwas nga nabalik ang bata sa pamilya niini ug susamang walay naangkong injury ang bata ug ang Pinoy nga nagluwas.
Nasayran sa mga awtoridad nga nanimuyo sa Japan ang nahisgutang Pinoy gumikan kay mipailalom kini sa technical trainee program.
Gusto untang sayron sa ginikanan sa bata ang tibuok pangalan ug address sa Pinoy gumikan kay gusto nilang pasidunggan kini ug hatagan ug gamay nga pasalamat.
Apan mitubag ang Pinoy sa lenggwaheng Hapones ug: “Nanoru hodo no mono de wan nai” nga ang buot ipasabot nga dili na importante aron masayran sa mga tawo ang iyang pangalan.
Daghan sa mga Hapon ang nakadayeg kaniya gumikan kay usa siya ka real life superhero nga miluwas sa kinabuhi sa bata.
