DAVAO CITY – Subling gipahimangnoan ang mga Pinoy ‘balikbayans’ ilabi na kadtong gikan sa mga kasikbit nga lalawigan sa nasod nga dili magdala ug karne sa baboy ug processed pork meat products ilabi na nga gi-lobby na sa mga local hog raisers ang pagpatuman sa mag-istrikto nga sumbanan aron nga malikayan ang pagsulod dinhi sa dakbayan sa African Swine Fever (ASF).
Kahinumduman nga human ang gipagula nga bulletin sa Department of Agriculture diin gikumpirma ang presensiya sa ASF sa nasod, gilayon nga nagpagula ang Hog Farmers Association of Davao Inc (HOGFADI) ug rekomendasyon nga did-an ang pagsulod sa mga karneng baboy ilabi na kadtong naggikan sa mga areas sa nasod nga positibo sa ASF.
Una ng gibutyag ni Eduardo So, HOGFADI president, nga sa kasamtangan nagpatuman na sila ug hugtanon nga inspeksiyon sa mga pantalan ug tugpahanan sa siyudad.
Samtang positibo si So nga mapalabang sa konseho ang rekomendasyon sa HOGFADI ilabi na nga suportado sab kini sa mga konsehal ning siyudad.
Nasayran nga ang HOGFADI gilangkuban sa 18 ka mga kompanya. Aron nga madungagan ang kaalam sa publiko kalabot sa ASF, nagapahigayon karon ang grupo ug seminars ingon man information campaign sa mga nagkadaiyang barangay sa rehiyon.
