DAVAO CITY- Gikanayon ni Angel Sumagaysay, hepe sa Public Safety and Security Command Center (PSSCC), atol sa gipahigayon nga presscon sa AFP-PNP nga ginahulat na lamang nila ang kumpleto ug pinal nga sumbanan kabahin sa mga transient vendors nga mamaligya karong umaabot nga pag-obserba sa kalag-kalag.
Gikatakda nga ipagawas karong adlawa ang sumbanan alang niini nga gibase usab sa nauyunan sa mga personahe sa City Economic Council lakip na usab ang City Treasurer’s Office sa siyudad sa Dabaw.
Kabahin sa nahisgutang sumbanan, gikinahanglan nga adunay permit ang matag mamaligyaay ilabi na sa mga pampublikong sementeryo.
Subay usab sa personal nga pakighinabi sa Bombo Radyo Davao ngadto sa officer-in-charge sa Roman Catholic Cemetery nga mao si Ruby Wapaño, usa sa giadtoan sa mga personahe sa City Council ang mga mamaligyaay sa nahisgutang sementeryo apan wala pa sila nasayod og pila ang gikinahanglan nga bayaran sa mga vendors.
Apan gibanabanaan nga mukabat ang permit og 400 hangtud 500 pesos.
Dugang pa niini, buhaton ug ipatuman ang maong sumbanan aron nga madisiplina usab ang mga vendors ug pagatagaan sila og saktong lugar aron makaplastar aron dili makababag sa dalan.
VIA|| Danica Baguio
