Misaka na usab ang Pilipinas sa ikalimang pwesto sa medal tally sa SEA Games 2025 sa Thailand, subay sa labing-ulahing datos alas-10 sa kagabii.
Nadugangan pa ang gidaghanon sa medalya sa nasud sa biennial games nga miabot na sa 141 ka medalya sa kinatibuk-an diin adunay 25 ka gold, 36 ka silver, ug 80 ka bronze.
Sa laing bahin, nanguna gihapon sa medal tally ang host country nga Thailand nga adunay 286 ka medalya, gisundan sa Indonesia ug Vietnam nga nahimutang sa ikaduha ug ikatulong pwesto. Samtang nagpakita og talagsaong kahanas ang Team Philippines sa practical shooting event sa SEA Games 2025 sa Thailand.
Nakuha nila Edcel Gino ug Genesis Pible ang gold medal sa men’s ug women’s production optic individual event.
Bulawang medalya usab ang nauli ni Rolly Nathaniel Tecson human modaog sa men’s standard individual.
Samtang, silver medal ang nakuha ni Evelyn Woods sa women’s production optic individual.
Bronze medalists usab sila Gerald Loy sa men’s open individual, Stephanie Lee sa women’s standard individual, ug Aeron John Lanuza sa men’s production optic individual.
Samtang, nakab-ot usab sa Paris Olympian nga si Elreen Ando ang gold medal sa women’s 63kg weightlifting event sa SEA Games 2025 sa Thailand, human makapahigayon og impresibong total lift nga 229 kilos.
Nakab-ot usab ni Naomi Cesar ang bulawang medalya sa athletics women’s 800m event sa SEA Games 2025 sa Thailand.
