Nahilakip sa unang higayon ang Pilipinas sa destinasyon sa French Air Force mission nga molibot sa Indo-Pacific region.
Kini gumikan sa tumong sa France nga mapakusgan pa ang defense ties niini sa Pilipinas.
Gilangkuban kini sa usa ka contingent gikan sa French Air and Space Force nga musalmot sa Pegase 24 nga mag-stop over sa Clark Air Base, Pampanga aron ipakita ang commitment sa European Country sa baruganan niini sa gawasnong pagbyahe ug pagpalupad sa mga sakyanang pangkahanginan sa rehiyon.
Ang Pegase 24 mao ang tinuig nga French mission sa Indo-Pacific region nga nagtumong ipakita ang air power projection. Sa stop over sa contingent sa nasud, gilauman ang bilateral activities aron makatabang sa pagtukod ug mga pundasyon sa air to air cooperation tali sa France ug Pilipinas.
Sa kasamtangan, adunay nagpadayong negosasyon sa duha ka nasud alang sa defense pact aron tugutan ang pagpadala ug military forces sa matag pikas nga bahin alang sa pagahimuong joint exercises.
