DAVAO CITY – Gipakusgan pa sa Provincial Government sa Davao De Oro ang ilang mga programa pinaagi sa ilang Provincial Health Office (PHO) aron mapugngan ang malnutrition sa probinsya.
Subay sab kini sa selebrasyon sa Nutrition month karon tuiga ubos sa tema nga “New normal na nutrisyon, sama-samang gawan ng solusyon” .
Ning bag-ohay lamang, ang Adopt-a-child program nga gipangunahan sa PHO ang nakahimo sa pag-rehabilitate sa 33 ka mga batang benepisyaryo nga kanhi hapit makasinati og malnutrisyon sa Laak sa nasangpit nga probinsya.
Malampuson sab gitubag sa programa ang mga babag nga nagpugong sa mga bata sa pag-access sa usa ka himsog nga kinabuhi ug pagkontrola sa mga epekto sa malnutrisyon.
Atol sa operasyon niini, ang programa nagtanyag og matag semana nga suplay alang sa matag benepisyaryo nga gipondohan gikan sa nagkalain-laing departamento sa provincial government.
Dugang pa sa PHO, nagpadayon ang paglusad sa community-based feeding program operations sa ilang buhatan diin mag-una sa Pantukan dayun sa Laak diin mao ang ika-duha nga lugar nga adunay taas nga malnutrition incident.
Samtang ang nasangpit nga programa mamahimo sab muserbisyo sa uban pang munisipalidad sa probinsya.
Via || Hana Rallos
