DAVAO CITY – Gipasabot sa Philippine Volcanology and Seismology (Philvocs) nga dakong tabang sa mga residente sa dakbayan nga masayran kung asa ang mga lugar nga delikado panahon nga motay-og ang kusog nga linog.
Kahinumduman nga kagahapong adlawa, gipangunahan sa Philvocs ug uban pang ahensiya sa gobyerno ang pagpahigayon ug Walk the fault activity sa Brgy. Oshiro sa Bago ning siyudad nga kalakip sa mga lugar sa siyudad nga nahimutang sa aktibo nga fault line.
Gibutangan kini sa ahensiya ug flag ingon man marka aron nga masayod ang mga residente ug makapangandam ang mga nahisgutan panahon nga mo-igo ang kusog nga kalamidad.
Tungod niini, gipasalig sa mga Barangay Officials sa Bago Oshiro nga mohimo na sila ug tukma nga lakang aron nga dili mabutang sa delikado nga sitwasyon ang mga residente sa lugar.
Gipasabot sab ni Alfredo Baluran, hepe sa City Disaster Risk Reduction and Management Office (CDRRMO) nga kung aduna may gambalay nga itukod sa lugar, makapangandam na kini kung unsa kalig-on ang kinahanglan nila nga himuon aron nga dili kini mahugno panahon sa kusog linog.
