DAVAO CITY – Gi-awhag sa ahensiya sa Philpost ang publiko nga mokuha ug postal ID gumikan kay mamahimo na kining magamit panahon nga adunay transaksiyon sa mga nagkadaiyang ahensiya sa kagamhanan.
Una na sab nga nasayran kang Atty. Leonora Tiongco, marketing manager sa Philpost, Davao area, makatabang sumala pa ang maong ID isip proof of identity ilabi na kung molatas sa mga checkpoint pasulod dinhi sa siyudad.
Nanawagan sab ang nahisgutan nga kung mokuha ug ID mamahimong moadto lamang sa ilang buhatan nga nahimutang sa Roxas Avenue nga anaa sa P504 ang processing fee.
Hinuon gitino ni Atty. Tiongco nga kinahanglan pa gihapon nga i-renew ang maong ID human ang tulo ka tuig.
Gipasalig sab sa opisyal nga safe na karon ang postal ID ug dili na dali nga mapake gumikan sa daghanan features niini.
Dili na sab malisdan ang mga mokuha niini gumikan kay personal kini nga ihatud sa ilang buhatan paghuman ang duruha ka semana.
