DAVAO REGION- Subling nanawagan ang Philippine Eagle Foundation ngadto sa otoridad nga ipatuman ang hugot nga polisiya ug balaod nga nagtumong sa pagpahunong sa bayolenteng mga krimen nga nasinatian sa mga agila.
Ang maong panawagan ang mahitungod sa kamatayon sa Philippine Eagle nga si “Magayon”, usa ka bata nga agila nga naluwas gikan sa Munisipalidad sa Compostela, Davao de Oro niadtong Hulyo 8, human kining gituuhang napusilan gamit ang usa ka improvised marble gun o holen gun.
Sumala pa nga usa ka personahe sa 25th Infantry ‘Fireball’ Batallion ug ang Indigenous leader nga si Datu Kaloy Bayani ang nakakita sa naangol nga agila sa Sitio Bermuda, Barangay Magayon sa Compostela, Davao de Oro niadtong adlawng lunes.
Tungod sa maong panghitabo, daling gipahibalo sa mga nakarescue sa agila ang Municipal Environment and Natural Resources Office ug ang Philippine Eagle Foundation.
Ang maong naangol nga si ‘Magayon’ ang gidala ngadto sa Compostela Municipal Hall kon diin anaa ang rescue team gikan sa Philippine Eagle Foundation ug dali nilang gi-assess ang maong samdang agila.
Matud pa nga ang maong agila ang unresponsive, underweight, dehydrated ug aduna kini abli nga samad sa wala niini nga pako.
Bisan pa man sa grabeng paningkamot sa rescue team samtang ilahang ginabyahe padulong sa dakbayan sa dabaw ang agila, milala gihapon ang kondisyon niini.
Gikumpirma usab sa necropsy niini nga ang hinungdan sa kamatayon ni Magayon, mao ang tungod kay nahutdan kini og dugo og sepsis gikan sa samad niini.
Kalabot sa maong kamatayon sa maong agila, subling mi-apelar ang Philippine Eagle Foundation ngadto sa gobyerno alang sa dugang interbensyon aron maluwas ang mga nameligro ng Philippine Eagle.
