Nagpadayag ug kabalaka ang mga pribadong hospital sa nasud sa mosobra sa P7 billion nga wala pa nabayarang serbisyo ubos sa Medical Assistance for Indigent and Financially Incapacitated Patients (MAIFIP) program sa gobyerno.
Gipahayag sa Private Hospitals Association of the Philippines Inc. (PHAPI), adunay pagduda kung makuha pa sa ilahang mga miyembro ang bayad, ilabi na ang ubang pasyente ang giindosar sa mga kandidatong napilde sa eleksyon kaniadtong Mayo 12.
Gipahayag ni PHAPI President Jose de Grano, adunay kabalaka ang mga hospital gumikan kay dili tanang mibarog nga sponsor sa mga pasyente ang midaug sa eleksyon.
Gibana-banaang 40% sa 1,200 ka mga miyembrong hospital sa PHAPI ang adunay natanggong nga bayronon nga wala pa nadawat gikan sa gobyerno. gumikan sa kadako sa utang, mamahimong maapektuhan ang operasyon sa pipila ka pribadong hospital ug ang serbisyong medikal nga ilahang gihatag sa mga nanginahanglang pasyente.
