DAVAO CITY – Mudawat na matud pa karon ang Peak Hours Augmentation Bus Service (PHABS) og mga bag-ong ruta human nga gitugtan na sa Land Transportation Franchising and Regulatory Board (LTFRB)-Davao Region ang special permits.
Kahinumduman nga gitugot na sa LTFRB-Davao Region ang special permits alang sa mga rota sa Calinan, Cabantian ug Lasang (via Sasa).
Subay sa memorandum circular, ang paghatag og dugang nga ruta ang gi-aprubahan human nga nakadawat ang ahensiya og sulat gikan kang Davao City administrator Zuleika Lopez diin mihangyo kini og dugang unom ka mga buses sa matag ruta aron nga i-deploy sa nahisgutan nga mga areas.
Una na sab sumala pa nga mihangyo sa LTFRB si City Transport and Traffic Management Office (CTTMO) head Dionisio Abude nga itugot ang dugang ruta gumikan kay daghanan sab nga mga pasahero sa dakbayan ang malisdan nga makasakay ilabi na sa peak hours.
Nasayran nga ang bag-ong PHABS buses mag-operate sugod alas sais sa buntag hangtud na sa alas nuebe sa gabii ug alas sais sa gabii hangtud na sa alas diyes.
Gikanayon sab sa LTFRB nga ang “one-way-limited-stops scheme” ang kinahanglan nga ipatuman base sa rekomendasyon sa CTTMO.
